Дубаи и во 2025 година ја потврди својата позиција како една од најатрактивните светски туристички дестинации, забележувајќи рекордна посетеност и континуиран раст на секторот.
Според податоците на Департманот за економија и туризам на Дубаи, градот во текот на 2025 година го посетиле 19,59 милиони странски туристи, што претставува зголемување од пет проценти во споредба со 2024 година, кога биле регистрирани 18,72 милиони посетители. Само во декември, повеќе од два милиони туристи пристигнале во емиратот, што дополнително ја зацврстува успешната туристичка година.
Престолонаследникот на Дубаи и претседател на Извршниот совет, шеикот Хамдан бин Мохамед бин Рашид ал-Мактум, истакна дека растот е резултат на долгорочната визија и стратегија поставена од шеикот Мохамед бин Рашид ал-Мактум, потпретседател на Обединетите Арапски Емирати, премиер и владетел на Дубаи. Според него, силните економски амбиции и јасната стратегиска насока придонеле туризмот да стане еден од клучните столбови на развојот.
Големите маркетинг-кампањи, организацијата на меѓународни настани и воспоставувањето стратешки партнерства одиграле значајна улога во зголемувањето на бројот на посетители. Паралелно со тоа, континуираното вложување во инфраструктурата и подобрувањето на услугите дополнително ја зголемуваат конкурентноста на градот на глобалната туристичка мапа.
Властите во Дубаи нагласуваат дека туризмот е клучен двигател на економската диверзификација и одржливиот раст. Во рамки на економската програма на градот, посебен акцент се става на развојот на интегриран туристички екосистем кој ќе овозможи Дубаи и понатаму да биде водечка дестинација за бизнис, одмор и живот.
Со фокус на иновации, квалитет на услугите и меѓународна соработка, Дубаи има амбиција да ја задржи и унапреди својата позиција како еден од најпосакуваните градови во светот за посета, работа и живеење.
