25-годишната Ноелија Кастиљо од Шпанија почина на 26 март, откако ѝ беше одобрено барањето за евтаназија. Нејзината животна приказна е исполнета со серија трагични настани кои оставиле длабоки физички и психолошки последици. Таа потекнувала од нефункционално семејство, каде родителите се соочувале со зависности и проблеми со менталното здравје. Поради тоа, голем дел од детството го поминала во згрижувачки дом.
Трауматичниот настан што го променил животот
Во 2022 година, Ноелија била жртва на групно силување од тројца млади момчиња. Овој настан значително го влошил нејзиното ментално здравје. Дополнително, таа претходно била сексуално нападната и од својот тогашен партнер. Неколку денови по групното силување, Ноелија се обидела да си го одземе животот. Обидот бил неуспешен, но како последица останала во инвалидска количка и со хронични болки.
Барањето за евтаназија
Соочена со постојано физичко страдање и тешка психолошка состојба, младата девојка поднела барање за евтаназија. Таа отворено зборувала за својата одлука, истакнувајќи дека живее со постојана болка и дека не гледа излез од состојбата.
„Сакам да си заминам и да престанам да страдам. Не ми се прави ништо – ниту ми се излегува, ниту ми се јаде. Не можам да спијам и имам болки во грбот и нозете“, изјавила Ноелија за шпанските медиуми.
Судската битка со семејството
Нејзиниот татко се спротивставил на одлуката и се обидел да ја оспори на суд. Судската постапка траела повеќе од година и пол. И покрај противењето од семејството, судот ја потврдил нејзината одлука и ѝ било дозволено да ја изврши евтаназијата.
Последните моменти
На 26 март, на Ноелија ѝ биле администрирани смртоносни инјекции. По нејзина желба, во последните моменти била сама во просторијата, само со лекарот кој ја спроведувал постапката. Така завршила животната приказна на младата девојка која со години се борела со болка, трауми и лични трагедии.
Евтаназијата во Шпанија
Евтаназијата во Шпанија е легализирана од 2021 година, а од тогаш се одобрени стотици барања за асистирано самоубиство. Случајот на Ноелија Кастиљо е еден од ретките што завршиле со долга судска битка, отворајќи повторно дебата за етичките и правните аспекти на ова прашање.
