Голема материјална штета е предизвикана откако во текот на изминатата ноќ била фрлена експлозивна направа – рачна бомба – врз семејната куќа на познатиот пејач Здравко Чолиќ, лоцирана во елитната белградска населба Дедиње. Во експлозијата е оштетена фасадата на објектот, а делови од шрапнели се расфрлале и во просторот каде што биле паркирани возилата. Според првичните информации, оштетени се и неколку луксузни автомобили долж улицата.
Српските медиуми информираат дека во инцидентот нема повредени, иако семејството Чолиќ во тој момент се наоѓало во куќата и спиело. Во домот биле Здравко Чолиќ, неговата сопруга Сандра и нивната ќерка Лара. Соседите сведочат дека силната детонација ги разбудила и предизвикала вознемиреност кај жителите од околината.
Полицијата веднаш излегла на терен, го обезбедила местото на настанот и го блокирала пристапот до куќата. Во истрагата учествуваат припадници на Министерството за внатрешни работи, заедно со дежурен обвинител од Вишото јавно обвинителство во Белград.
Во моментов е во тек детална истрага за расветлување на сите околности поврзани со овој сериозен инцидент. Форензичките екипи собираат докази, а се анализираат и снимките од безбедносните камери во близина. Надлежните органи треба да ги утврдат мотивите за нападот и да го идентификуваат сторителот на овој вознемирувачки настан.
