Сојузот на синдикати на Македонија денеска од 9 часот ќе го блокира пристапот до Собранието, како протест против, според нив, долгогодишното одолговлекување на законот за зголемување на минималната плата. Ќе бидат затворени улиците „Даме Груев“ и „11 Октомври“.
Од ССМ порачуваат дека пратениците повеќе од една година не ја прифаќаат иницијативата за зголемување на минималната плата за 100 евра, ниту предлогот функционерските плати значително да се намалат. Претседателот на ССМ, Слободан Трендафилов, вели дека пратениците игнорираат и барање за намалување на нивните плати за 80 проценти.
Претседателот на Собранието Африм Гаши изјави дека парламентот ќе работи и покрај протестот и очекува тој да помине мирно, без дополнително обезбедување. Според него, ќе бидат блокирани само влезовите за возила.
Во однос на барањата за минимална плата од 600 евра, Гаши рече дека секоја партија ќе има свој став. Премиерот Христијан Мицкоски повтори дека минималната плата ќе се усогласи согласно законот, а Владата нема да ги покрива придонесите за работодавачите. Тој најави и корекција на платите на функционерите до крајот на февруари.
Министерот за економија и труд Бесар Дурмиши изјави дека одлуката за минималната плата ќе се носи по добивање на податоците од ДЗС и во март се очекува зголемување од 1.500 до 2.000 денари. Тој нагласи дека Владата ќе поддржи договор меѓу синдикатите и работодавачите, но без финансиска поддршка од државата.
