Билетите за Евровизија што ќе се одржи во Виена беа распродадени со неверојатна брзина, при што речиси сите 90.000 влезници биле купени за само неколку минути, информираа организаторите. Полуфиналните натпревари се закажани за 12 и 14 мај, додека големото финале ќе се одржи на 16 мај.
Според соопштението на Европската радиодифузна унија (ЕБУ), билетите за финалната вечер биле целосно распродадени за само 14 минути, а влезниците за останатите настани биле продадени во рок од еден час. За време на евровизиската недела ќе се одржат вкупно девет настани, меѓу кои и по две генерални проби пред секое директно телевизиско пренесување.
На 70. издание на Евровизија ќе настапат 35 земји, откако неколку држави решија да се повлечат од натпреварот поради учеството на Израел.
