Гренланд е најголемиот остров на светот што не е континент, со површина од околу 2,16 милиони квадратни километри, што го вбројува меѓу најголемите држави на планетата. Приближно 80 проценти од неговата територија е покриена со масивна ледена покривка – втора по големина во светот по Антарктикот – чија дебелина на одредени места достигнува и до 3.500 метри. Областа без мраз е голема речиси колку Шведска.
Островот нуди исклучително разновидни пејзажи – од фјордови и глечери до сурови арктички пространства. Воедно, Гренланд е богат со ретки минерали, скапоцени камења и значајни резерви на нафта и гас, иако нивната експлоатација и натаму е ограничена поради екстремните климатски услови.
На североистокот на Гренланд се наоѓа најголемиот национален парк во светот, дом на арктичката дива природа. Тука е и еден од најактивните глечери на северната хемисфера – Сермеќ Кујалек, кој го создава познатиот Илулисат Ајсфјорд, заштитен како светско наследство на УНЕСКО.
И покрај доминацијата на мразот, Гренланд има и природни топли извори, како оние на островот Уунарток, каде е можно капење во геотермална вода. Островот е познат и по исклучително чистиот воздух и вода – питката вода може да се пие директно од планинските потоци.
Името „Гренланд“ значи „Зелена земја“ и потекнува од викингот Ерик Црвениот, кој сакал да привлече доселеници. Научните истражувања потврдуваат дека островот навистина бил зелен пред милиони години. Денешните жители, главно Инуити, ја нарекуваат својата земја Калаалит Нунаат, а човечко присуство на островот постои повеќе од 4.500 години.
Гренланд денес е автономна територија во рамки на Кралството Данска, со проширена самоуправа од 2009 година. Иако географски припаѓа на Северна Америка, историски и културно е поврзан со Европа.
Поради својата локација, Гренланд има огромно геостратешко значење. Со децении е во фокусот на интересите на САД, особено поради воената безбедност, новите арктички трговски патишта и богатите природни ресурси. Иако островот нема сопствена војска, секоја идеја за промена на неговиот статус би имала сериозни безбедносни последици на глобално ниво.
