Градот Аомори во Јапонија се смета за најснежното урбано подрачје во светот. Во главниот град на префектурата Аомори, сместен на најголемиот јапонски остров Хоншу, секоја година во просек наврнуваат околу 7,9 метри снег, што го става на самиот врв на глобалните статистики.
Јапонија воопшто важи за земја со најобилни снежни врнежи на планетата. Податоци од AccuWeather покажуваат дека дури три јапонски града со над 100.000 жители се меѓу најснежните во светот, надминувајќи ги по количина на снег и Канада, Русија, Норвешка и други земји познати по суровите зими.
Во Аомори, снежната покривка трае речиси половина година – од ноември до април. Улиците и тротоарите редовно се затрупани со високи наслаги од снег и мраз, кои со текот на зимата стануваат сè подлабоки, и покрај постојаното чистење со специјализирана механизација.
Со слични предизвици се соочува и Сапоро, најголемиот град на островот Хокаидо, каде што годишно во просек паѓаат околу 4,85 метри снег. Токму таму се одржува прочуениот зимски фестивал „Јуки Мацури“, кој привлекува илјадници посетители со своите импресивни скулптури од снег и мраз.
Значителни снежни врнежи се бележат и во градот Тојама, лоциран на брегот на Јапонското Море, каде што просечната годишна количина на снег изнесува околу 3,6 метри.
Експертите објаснуваат дека екстремните снежни услови во Јапонија се резултат на специфична комбинација од географска положба и климатски влијанија. Во зимскиот период, ладни воздушни маси од Сибир се движат преку Јапонското Море, кое е релативно топло. Овој судир создава влажни облаци што, при наидување на планинските венци, се ладат и предизвикуваат обилни снежни врнежи кои понекогаш траат со денови.
